طريقة فرخه مشويه ومقرمشه بتتبيلة الدقيق

لبنى أحمد – الاسكندرية
هندخل في الطريقه على طول
فرخه مغسوله ومقسومه من الظهر يرش عليها معلقة صغيره ملح وفلفل ونوزعها عليها من كل ناحيه وبين الجلد والعظم وتترك ساعتين لتتشرب الملح والفلفل
التتبيله
3 معالق كبيره دقيق ويضاف عليهم معلقه صغيره ملح وفلفل ومعلقه كبيره بابريكا وتوم وبصل بودره ومعلقه صغيره كسبره ناشفه ويتبل الدقيق جيدا
ونأخذ الفرخه ونضغط عليها علشان نتخلص من أي ماء فيها ونرش عليها الدقيق المتبل من كل ناحيه بس منحطش تحت الجلد علشان ميعجنش فوق كل جلد الفرخه ونقلبها وبرده نوزع دقيق متبل من الداخل وعلى العظم تبطن جيدا بالدقيق من الناحيتين وتحت الاجنحه وتوضع كده زي ماهي في صينيه من غير اي ماده دهنيه ونكون مسخنين الفرن جدا وحتى من غير ما نغطيها وتدخل الفرن السخن مدة ساعه حتى تستوي ونختبر السوى نغرس سن السكينه في الورك لو طلع دم او ماء تبقى لسه مستوتش ونسبها كمان 10 دقايق وبعد ما تستوي هيكون وجه الفرخه مقرمش جدا بس لسه لون الدقيق ظاهر نأخذ من الدهون اللي طلعت من الفرخه بالفرشه وندهن كل الفرخه جيدا ونولع الشوايه وتحمر وتكون لونها ذهبي تحفه كده وتقدم وهى ساخنه مع مكرونه وسلطه او أي نوع أرز والف هنا وشفا بس اهم حاجه تتقدم ساخنه علشان تكون لسه مقرمشه لانها كل ماتبرد هتطرى شويه زي أي فراخ مقرمشه
مفيش اسهل لا أحلى ولا أخف من كده وهتكون مقرمشه جدا من بره وطريه جدا ومستويه على الاخر من جوه بجد ياريييييت تجربوها