الرئيسية / شعر / فينك يا عم جميل

فينك يا عم جميل

فينك يا عم جميل

بقلم/  مصطفى سبتة

عارفين عم جميل الحر
وشه بيضحك رغم المر
عايش متوكل على ربه
عارف يوم الصعب يمر
جاره كان عم نجيب الحامى
فاكر نفسه مخلوق سامى
كل جيرانه بيشتكوا منه
عارفين أصلا إنه حرامى
وعمنا رزق مجرد إسم
عايش ليله نهاره ف غم
آخر الليل بيتوه ب حشيشة
فاكر قال راح ينسى الهم
والستات ف حارتنا يوماتى
حاشرين مناخيرهم ف حياتى
خرجت امتى وراحت فين
شاغلين بالهم بيا ليلاتى
والشبان على باب الشارع
دول للموضة أهم متابع
بوكسر باين شعر كنيش
والله يابنى منتاش نافع
ولا الطفل النبغة حمادة
حافظ أفلام زى العادة
يعرف إيه عن صلاة أو صوم
يفهم إيه عن أى عبادة
عمنا رزق وعم نجيب
نسيوا الصح ونسيوا العيب
حتى الأولاد والمدمات
حاجة تخلى الشعر يشيب
أى خناقة تلاقى 100سنجة
ممكن عادى تلاقى طبنجة
والستات مع بعض بتردح
لو تتفرج هتجيك جلطة
ف الأفراح هتلاقى البيرة
بنت الحتة تشوفها شاكيرا
الله يرحم أيام ستك
كانت التركة توب وحصيرة
حتى الموت مبقاش له حرمة
نعش وماشى يقابل زحمة
تسأل إيه هيقولك عادى
شبكة توتو وفاتحة رحمة
دول أمثله حية من الحتة
ليه اتقطعنا ل 30 حتة
كنا زمان لو حد أتألم
جرحنا واحد على 100جتة
راحت فين أيام اللمة
كنا بتقاسم ف اللقمة
فرحك فرحى وزعلك زعلى
كنا الضحكة فعز الأزمة
وعم خليل عمال بيكافح
نفسه يربى ويطلع فالح
ربك هيساعده وهيعينه
ويشوف شجر الأمل الطارح
ادعوا لعم خليل يتوفق
ويشوف أحلامه بتتحقق
ويبعد عننا شر السبكى
ونعيش صح وعندنا مبدأ

Be Sociable, Share!

عن Tamer ahmed

شاهد أيضاً

مادام النبض يحيينا

مادام النبض يحيينا بقلم/  مصطفى سبتة وهل يذبل الورد لو تسقيه أدمعنا أم أنه باق …