الرئيسية / عاجل / قصيدة عامية : برضه بحبك

قصيدة عامية : برضه بحبك

شعر : عادل عبد الرازق

برضه بحبك
أيوة بحبك
من بين الملح اللي مزهر جوًه ف دمي
من بين صبار المر المزروع في كياني
بابعتلك وباقولك إني باعيش
باكتب على بابي حروف إسمك
وازرع لبلاب شعرك على شباكي
وافتح بابي ولا أوارب
رغم الشبح اللي ف أخر الشارع
أنا لما مشيت مرة في الشارع
كان طفل وطفلة ف ركن الشارع
بيمدوا كفوفهم ويشدوا الفجر
مديت كفي معاهم وانا باحلم
وانا بارسم ..
شكل ملامحك فوق قمر الحيً
وباضل طريقي لكن بارجع
واطلق غناويًا ف أحزاني
وافرد في جناحي عالآخر
ترفضني الشبابيك المقفولة في الشارع
وأشد حصاني وارفع سيفي
ولا يجمح بي في ليل الضلمة ولا الشارع
وباحبك ..
أيوة باحبك
رغم ان طريقنا ما بينا صبح متكسر
رغم الأسوار ومفارق الضلمة
والخطوة اللي ماعرفت تبدأ رحلة
باصرخ إنك إنتي زماني الأول
وباحاول أبدأ م الأول
وان خنقوا قمري في سمايا
بارفض إني أبيع الشمس للون الضلمة
رغم انك مش ليًا باحبك
مرسوم في عينيكي وفي قلبك
من قبل ميلادي بسنين
من قبل زمان التكوين
من قبل البحر ما يحدف غرقانه
.. متمدد عالشطين

عن admin

x

‎قد يُعجبك أيضاً

القوات الجوية المصرية واليونانية تنفذان التدريب الجوى المشترك ( مينا - 2 )

القوات الجوية المصرية واليونانية تنفذان التدريب الجوى المشترك ( مينا – 2 )

القوات الجوية المصرية واليونانية تنفذان التدريب الجوى المشترك ( مينا – 2 )  رباب عنان ...